သောကများနဲ့ မနက်ဖြန် ၄
တက္ကသိုလ်အသစ်ကြီးဆိုသို့…………..တစ်ရွာမပြောင်း သူကောင်းမဖြစ်လို့ ပြောရမလားပဲ။ အခြေအနေ အချိန်အခါအရ ကျုပ်တို့ဘ၀တွေဟာ အမျိုးမျိုးပြောင်းလွဲကြရတယ်။ ဒီအခါ အပြောင်းအလဲ မှန်ဘို့လိုတယ်။ အပြောင်းအလဲသည် ပစ္စုပ္ပန်နှင့် အနာဂတ်ကို လောင်းခြင်းထပ်ခြင်းဖြစ်သည်။ ပစ္စုပ္ပန်၏တန်ဖိုးကို ကျုပ်တို့ သိပေမယ့် အနာဂတ်ရဲ့ တန်ဖိုးကိုတော့ မဆုံးဖြတ်နိုင်ကြ။ ဒီအခါ ပစ္စုပ္ပန်ကို အနာဂတ်အတွက်ရင်းနှီးလိုက်ကြရတော့သည်။ ထိုအခါ လှုပ်ရှားမှုအားလုံးသည် ရင်တမမ၊ ဟုတ်မှ ဟုတ်ပါ့မလား။ မှန်မှ မှန်ပါ့မလား။ မှားများသွားပြီလား။ နောက်ဆုတ်မထင်တယ် စသည်ဖြင့် ချီတုံချတုံဖြစ်တတ်သည်။ ထို့ကြောင့် အနာဂတ်ကို မှန်းပြီး ပြောင်းလွဲလိုက်သောအခါ ကံသည်လည်း အရေးကြီးသည်။ မျှော်မြင်တတ်တဲ့ ဥာဏ်သည်လည်း အရေးကြီးသည်။ လိုအပ်သလို လုပ်ဆောင်မှု ၀ီရိယလည်း အရေးကြီးသည်။ ကံ၊ဥာဏ်၊ ၀ီရိယ ဒီသုံးခုမှာ ကံက မမြင်နိုင်။ အထူးသဖြင့် အနာဂတ်ကံသည် မမြင်နိုင်။ ထို့ကြောင့် မျက်စိမှိတ်ဆုံးဖြတ်တာမျိုး ရှိတတ်ကြသည်။
အနာဂတ်တစ်ခုအတွက် မျက်စိမှတ် ဆုံးဖြတ်တာထက် ကောင်းသော ဆုံးဖြတ်ချက်တစ်ခုရှိသည်။ အဲဒါကတော့ ဆုံးဖြတ်ချက် မချခင်မှာ ကုသိုလ်တွေများများလုပ် ကုသိုလ်စိတ်တွေများများဖြစ်စေပြီး ဆုံးဖြတ်ချက်ချလျှင်။ ထိုဆုံးဖြတ်ချက်သည် ကျုပ်တို့ အနာဂတ်အတွက် ကံကောင်းသော အပြောင်းအလွဲကို ဖြစ်ပေါ်စေမယ်လို့ ကျုပ်ယုံကြည်ခဲ့တယ် ဒါကြောင့် ကျုပ် ဒုတိယအကြိမ်၊ ဟိမ၀န္တာဆိုတဲ့ ဒေသအ၀င်အပါ ဒရမ်စလာဆိုတဲ့ အိန္ဒိယနဲ့ တိဗက် (ယခု တရုတ်) တို့နဲ့ နည်းတဲ့ ဒေသမှာ တရားထိုင်သွားလိုက်ပြန်တယ်။
တရားထိုင်တဲ့ ရည်ရွယ်ချက်ကတော့ ၂ ခု။ တစ်ခုက ဟိမ၀န္တာဒေသဆိုတာကို စိတ်ဝင်စားလို့။ ရှေးက သူတော်ကော်း ဘုရားပစ္စေက ဗုဒ္ဓါတွေ ပျော်စံရာလို့ စာတွေထဲဖတ်ဘူး မှတ်ဖူးလို့ အဲဒီဒေသကို တရားထိုင်ဖူးအောင် ထိုင်ချင်တာ။ နောက်တစ်ခုက ဒေလီမှာဆက်မတက်ဘဲ အခု အခြားတက္ကသိုလ်မှာတက်တာသည် မှန်သလား မှားသလားဆိုတာကို သေသေချာချာ ဆုံးဖြတ်ချက် ချချင်လို့ တရားစခန်းဝင်ခဲ့တာ။ အချိန်ကာလာအားဖြင့်ဆို မြန်မာပြည်မှာ ရခိုင်အရေးအခင်းဖြစ်တဲ့ ၂၀၁၂ နွေရာသီအချိန်ပေါ့။ တရားစခန်းကထွက်လာပြီး နယ်ပြောင်းကစားဘို့ ဆုံးဖြတ်ချက် အသေအချာချလိုက်ပြီ။
တက္ကသိုလ်ပြောင်းဘို့ စိတ်ကူးလိုက်ပြီ။ ပြောင်းဘို့စိတ်ကူးပြီးရွေးလိုက်တာက Gautam Buddha University။ တည်ရှိရာက U.P ပြည်နယ်ထဲပါတယ်။ ဒါပေမယ့် ဒေလီဧရိယာဘဲ။ ဒေလီနဲ့နီးတယ်။ စစ်ကိုင်းနဲ့မန္တလေးလိုမျိုးပေါ့။ တိုင်းကွာတယ်။ နေရာဒေသနီးတယ်။ ဒေလီရဲ့ မြို့သစ်လို့ခေါ်ဆိုရမယ်။ Noida ကိုပြောင်းခဲ့တယ်။ မြို့သစ်ဆိုတော့ တိုက်တာတွေက သေသေချာချာချာစနစ်တကျဆောက်ထားတာ။ လမ်းတွေကလည်းအကျယ်ကြီးတွေ သစ်ပင်တွေကလည်းစိမ်းလန်းစိုပြေတော့ တက္ကသိုလ်မရောက်ခင် အဝေးပြေးလမ်းမကြီးပေါ်ရောက်တော့ ဘေးကသာယာလှပတဲ့ ရှုခင်းတွေ လေကောင်းကောင်းလေသန့်တွေကို ခံစားရပြီး “ငါဒီတက္ကသိုလ်ကိုသေချာပေါက်နေတော့မယ်” ဆိုပြီး ဆုံးဖြစ်ချက်ချခဲ့တယ်။ အပြင်ရှုခင်းတွေနဲ့တင်ဆုံးဖြတ်ချက်ချခဲ့တာ။
ဒေလီကမြို့ကြီးဆိုတော့ နေ့ည လူသူထူထပ်။ ဆူဆူပူပူ။ ဆူဆူညံညံ။ ညဘယ်အချိန်ထထ ကားသံတွေက တညံညံ။ မကောင်းတာတော့မဟုတ်ဘူး။ လူတွေအများကြီးနဲ့ ၂ နှစ်ပတ်လုံးနေခဲ့ရတော့ လန်းလန်းဆန်းဆန်းနေချင်လာတယ်။ ဒါကြောင့် ပတ်ဝန်းကျင်ကိုကြည့်ပြီးတော့လည်း ဒီတက္ကသိုလ်ကိုရွေးခဲ့တယ်။ တက္ကသိုလ်နာမည်က Gautam Buddha University ဂေါတမ်ဗုဒ္ဓတက္ကသိုလ် (ဂေါတမဗုဒ္ဓရဲ့တက္ကသိုလ်)။
မုခ်ဦးဂိတ်နံပတ် ၂ ကနေ၀င်လိုက်တော့ ၀င်ဝင်ချင်းလမ်းမှာတွေ့လိုက်ရတာ Siddhatha path သိဒ္ဓတ္ထလမ်းတဲ့ ရှေ့ဆက်သွားတော့ ရေကန်ကြီးနဲ့ ဗုဒ္ဓရုပ်ပွားတော်အကြီးကြီး။ ဗုဒ္ဓရုပ်ပွားတော်ဘေးမှာကတော့ ဒီတက္ကသိုလ်ကိုတည်ထောင်ခဲ့တဲ့ U.P ပြည်နယ်ရဲ့ဝန်ကြီးချုပ် မာယာဝတီ နဲ့ သူ့ဆရာရုပ်တုကိုပါတွဲပြီးထုထားတယ်။ မာယာဝတီကလည်း ဗုဒ္ဓဘာသာ။ ဒါကြောင့် ဒီတက္ကသိုလ်ဟာ ဗုဒ္ဓဘာသာကိုအထူးပြုတဲ့တက္ကသိုလ်ပါဘဲ။
အဲဒီမှာစဉ်းစားမိတာက တစ်ခြားတက္ကသိုလ်တွေထက်စာရင် ကိုယ့်ဗုဒ္ဓဘာသာကိုအလေးထားဦးစားပေးတက္ကသိုလ်မှာ ပိုက်ဆံကုန်ရတာ ကုန်ရကြိုးနပ်တယ်ဆိုပြီး ဒီတက္ကသိုလ်ကို တကယ်နေဘို့ ထပ်မံ ရွေးချယ်ဆုံးဖြစ်လိုက်တယ်။ အစကတော့ မြေစမ်းခရမ်းပျိုးတဲ့သဘောမျိုးနဲ့ လာခဲ့တာ။ လမ်းမှာကလည်းက သစ်ပင်တွေက လယ်ကွင်းတွေ ရူခင်းတွေက စိမ်းစိမ်းစိုဖြစ်နေကလည်းက နေဘို့စိတ်ကူးခဲ့ပြီးသား။
ဒီမှာရောက်တော့ ကန်နဲ့ ဘုရားနဲ့ ဆိုတော့ ထိပ်ဆုံးသို့ ကဗျာထဲကလို “မာလာငွေကန်ရေအေးရယ်နင့် ငှက်တေးကိုအာရုံဆင်လို့” ဆိုသလိုပဲဗျ။ အတွင်းရုံးခန်း ဆရာနဲ့သွားတွေ့၊ ဆရာကလည်း ဒီနှစ်မှ ဒေလီတက္ကသိုလ်ကပြောင်းလာတဲ့ သမိုင်းဆရာ။ ဒေလီမှာ ဒီလောက်မခင်ပေမယ့်။ သူကလည်း ရာထူးတိုးနယ်ပြောင်း။ ပြီးတော့ ဒီတက္ကသိုလ်ရဲ့ Buddhist Studies ဌာနက ဒီနှစ်မှ စဖွင့်တာဆိုတော့ ကျောင်းသားတွေကို လိုလိုချင်ချင်လက်ခံတယ်။ကြိုဆိုတယ်။ ၀မ်းမြောက်ဝမ်းသာ ပြောဆိုဆက်ဆံတယ်။
အဲဒီအခါ ကျုပ် အိန္ဒိယဆိုတာကို မေ့သွားပြီး ကိုယ့်ဦးလေးအိမ်။ ကိုယ့်ဦးလေးရှိတဲ့ဆီ အလည်သွားရသလိုအထိကိုခံစားမိတာ။ အဲဒီလောက်အထိကို ပြုစုတာ။ဆက်ဆံတာ။ အပြန်ကျတော့ ကားဂိတ်အထိ ဆရာက ကားနဲ့လိုက်ပို့တာ။ ဆရာ့နာမည်က Dr.Arvind Kumar Singh . ဘ၀မှာကျေးဇူးများတဲ့ဆရာဖြစ်လာပါတယ်။
ဆရာနဲ့လည်းအများကြီး အများကြီးကိုရင်းနှီးလာပါတယ်။တက္ကသိုလ်ကလည်းအသစ်ဆိုတော့။ ပထမဆုံးမြန်မာပြည်ကကျောင်းသားတွေပါဘဲ။ ၂ ပါးဘဲရှိသေးတယ်။ ကျုပ်တို့ ဌာနမှာ ကျုပ်ရော နောင်ကြီးဦးတိလောက (ခရမ်း)ရောမှ မြန်မာပြည်က ၂ ပါးထဲ။ ဗီယက်နာမ်ကတော့ များတယ်။ G.B.U (Gautam Buddha University ) ပထမဆုံးကျောင်းသားတွေဖြစ်သလို၊ မြန်မာပြည်က ပထမဆုံးကျောင်းသားတွေပါဘဲ။ တက္ကသိုလ်ရဲ့ဌာနကလည်း ဒီနှစ်မှစတင်ဖွင့်တာဆိုတော့ ကိုယ့်အတွက်များစောင့်နေသလားလို့တောင် ထင်ရလောက်တယ်။ မြေစမ်းခရမ်းပျိုးတာ အဲဒီပျိုးလိုက်တဲ့ခရမ်း မြေရေလေ ရာသီဥတု အစုံညီလို့ထင်တယ်။ တော်တော်အဆင်ပြေတယ်။ ရေးဖြေဖြေရတဲ့ M.Phil စာမေးပွဲမှာလည်း ပထမရသလို။ ဒုတိယတစ်ဖြတ် ကျမ်းစာရေးပြီး၊ ကျမ်းစာတင်။ပြီးတော့ နှုတ်ဖြေစာမေးပွဲ စာမေးပွဲတွေမှာလည်း အမှတ်အများဆုံး ပထမရခဲ့ပါတယ်။ ကျမ်းကိုလည်း တက္ကသိုလ်တစ်ခုံးရဲ့ M.Phil အတန်းကျောင်းသားတွေထဲမှာ ပထမဆုံးတင်နိုင်ခဲ့တယ်။ ပထမရလို့ ရွှေတံဆိပ်ပေးရင် ကျုပ် ရွှေတံဆိပ်အထိရမှာပေါ့။(ပေးမပေးကတော့တက္ကသိုလ်ရဲ့တုန့်ပြန်မှုပေါ့။ တအားကြီးတော့မမျှော်ပါဘူး။ မျှောရမောလွန်းလို့………..)။ ကျုပ်တော်လို့ ရတယ်လို့ မပြောလိုပါဘူး။ ဘောလုံးစကားနဲ့ ပြောရရင် ပွဲစဉ်ချောင်သွားတာနေမှာပေါ့။ ဒေလီမှာတုန်းကတော့ ကျုပ်ရဲ့ အထက်မှာ လူတွေအများကြီးဗျ။
အခု ပထမရလို့ ၀မ်းတအားမသာပေမယ့်၊ ဆရာတွေရဲ့ ယုံကြည်မှုကိုထိန်းပေးနိုင်၊ ပြပေးနိုင်လို့ ကျေနပ်မှုတော့ ရှိတယ်။ (တစ်ချို့ ဆရာတွေက ကျုပ်ကို စာရတယ်ထင်ကြတာ။ ကျုပ်တို့အားလုံးလေးစားရတဲ့ ဆရာမကြီး ကဆို အခန်းထဲမှာစာသင်ရင်း သူသံသယရှိတဲ့ ဘုန်းကြီးစာပေဆိုင်ရာဆိုရင် "ဘန္တေ မင်းသိတယ်။ ပြောစမ်း" ဆိုပြီး အတန်းထဲမှာလည်း မေးဖူးတယ်။ ကျုပ်ကလည်း မှားတယ်ထင်တဲ့ ၀ိနည်း သိက္ခာပုဒ်အယူအဆမှာ စာအုပ်ကလေးယူသွားပြီး သူ့အခန်းထဲကျမှ ဆရာမ ဒီဟာကဒီလိုရှိတယ်ဗျဆိုပြီး ထောက်ပြ အကြံဥာဏ်ပေးဖူးတယ်။ အဲဒီတုန်းက သူက ကျေးဇူးတင်နေတာ။ တစ်ခါ အပြင်ရုံးမှာတွေ့တော့လည်း သူသိချင်တာလေး သူ့ရုံးခန်းခေါ်ပြီး မေးဖူးတယ်။
နောက်ဆရာတစ်ယောက်ကဆို ဂေဇတ်အောင်စာရင်းကို ပြတော့ ကျုပ်က ဘာသာတစ်ခုမှာ ex81 ဆိုပြီးရထားတာတွေ့တယ်။ အဲဒါကျုပ်တစ်ယောက်ထဲ။ ဒါနဲ့ ကျုပ်လည်းမသိလို့ ဆရာ့ကို မေးတယ် "ဆရာ ex ဆိုတာ ဘာလဲ" လို့မေးတော့။ Ex ဆိုတာ Excellent တဲ့ အမှတ် 80+မှ ရတာတဲ့။ အဲဒီတော့ ဘေးက ဗီယက်နာမ် ကျောင်းသူက ထပ်မေးတယ်။ ဥာဏ၀ရတော့ excellent ရပြီး ငါ့ကျတော့ ဘာလို့မရတာလဲ မေးတော့။ ဆရာကပြန်ပြောလိုက်တာက " ဥာဏ၀ရ က ငါသင်ထားတာထက် ဖြေနိုင်တယ်" တဲ့။ အဲဒါနဲ့ ရေးဖြေမှာ ကျုပ် ပထမရတယ်။ နောင်အင်တာဗျူးမှာလည်း သူများတွေက ခုနက ပြောခဲ့တဲ့ ဆရာမကြီးဆိုကြောက်ကြတယ်။ ကျုပ်အလှည့်ရောက်တော့ သူကမေးတယ်။
"ဗုဒ္ဓဘာသာက ဒုက္ခအကြောင်းတွေပဲ အမြဲ စောင်းပေးပြောနေတော့ တစ်ချို့က ဗုဒ္ဓဘာသာကို အဆိုးမြင်ဝါဒလို့ ဆိုကြတယ်။ မင်း အဲဒါကို ဘယ်လို သဘောရလဲ" တဲ့။ ဒီတော့ ကျုပ်ဖြေလိုက်တဲ့ အဖြေက
" မဒမ် (ဆရာမ) မင်းဟာ ငါ့ဆရာမပါ။ ငါဟာ မင်းကျောင်းသားပါ။ ဒီအကြောင်းတွေကို မင်းက အတန်းထဲမှာ သေချာရှင်းပြခဲ့ပြီးပါပြီ" လို့ ကျုပ်က ရိုးရိုးစာကို ကိုးကားမပြဘဲ။ သူသင်တုန်းက အတန်းထဲကရှင်းပြချက်ကို မှတ်မိသည်အထိ ရှင်းပြလိုက်တော့ သူအပါဝင် တစ်ခြားဆရာ ၂ ယောက်နဲ့ ဆရာ ၃ သုံးယောက်လုံး တဟားဟားးးးးးနဲ့ ရယ်နေကြတာ" အဲဒီနှုတ်ဖြေ အင်တာဗျူးမှာလည်း သူများတွေက ၇၅၊ ၇၅ မှတ်နဲ့ စံချိန်ချိုးနေကြတဲ့ အချိန်၊ ကျုပ်က ၇၆ နဲ့ အများဆုံးရခဲ့တာပဲ။ ခင်ဗျားတို့ပဲ စဉ်းစားကြည့်လေ သူသင်ပေးတဲ့ အတန်းထဲကအတိုင်း ကိုးကားပြလိုက်တာ ဘယ်ဆရာက မကြိုက်ဘဲ နေမလဲဗျ။ (အတန်းထဲမှာ သူသင်ပြပေးခဲ့တာက ဗုဒ္ဓ၀ါဒသည် ဒုက္ခအကြောင်းကို ဟောထားပေမယ့် အဆိုးမြင်ဝါဒမဟုတ်။ ဘာကြောင့်လည်း ဆိုတော့ ဗုဒ္ဓသသည် ဒုက္ခသက်သက်တာ ဟောခဲ့သည်မဟုတ်။ ဒုက္ခ၏လွတ်ရာနိဗ္ဗာန်၊ ထိုဒုက္ခလွတ်ရာနိဗ္ဗာန်သို့ရောက်ကြောင်းအကျင့်ကိုလည်း ဟောခဲ့တာဖြစ်လို့ အမှန်မြင်ဝါဒပါလို့ သူပြောပြသွားခဲ့တာ။) ဘာပဲပြောပြော ဒီလို ဆရာတွေရဲ့ ယုံကြည်မှုရတာလေးတွေတော့ ကျုပ်ကျေနပ်ခဲ့တယ်။ စာလုပ်ခဲ့ရတဲ့ အတွက် အပင်ပန်းခံရကျိုးနပ်တယ်ဗျာ။
အဲဒီ M.Phil ကာလဟာ ပန်းမာလာ ငွေကြာပန်းတို့ရောပြွမ်းပြီး ကြည်လင်အေးချမ်းတဲ့ ရေကန်အေးအေးလေးဘေးမှာ ခနတာ အပန်းဖြေပြီး၊ တီတီတာတာ ပျော်မြူးသီကျူးနေကြတဲ့ ကျေးငှက်သာရကာတို့ရဲ့ အသံလေးတွေကို နားဆင်ပြီး အပန်းဖြေခဲ့တဲ့ကာလပေါ့။ (အဲဒီ M.Phil ကျမ်းကို ဘွဲ့ရယူယုံသက်သက်အတွက်ရေးခဲ့တာမဟုတ်ဘဲ တကယ် သောကလူသားတွေအတွက် သောကဖြေဖျောက်ဆေးကိုရှာဖွေဖော်စပ်တဲ့အနေနဲ့ လူသားတွေအကျိုးပြုဘို့ရည်ရွယ်ချက်နဲ့ပါ ကျုပ် ရင်နဲ့ရင်းပြီး ရေးသားခဲ့တယ်)။ နပိုလီယန်ရဲ့ စကားအတိုင်း အခါအခွင့် သင့်လို့ အရည်အသွေး အရာထင်လာတာထင်ပါရဲ့ဗျာ။ မောက်မာမော်ကြွားလိုစိတ်မရှိပေမယ့် ကျုပ်တယ်လုပ်ခဲ့တဲ့ အကျုပ်အလုပ်အတွက် မှတ်တမ်းလေးတော့ တင်ချင်တာပေါ့။ ဒါကြောင့် ကျုပ် အစုံအစေ့ရေးလိုက်တာ။
ဒါဆိုရင် ကျုပ်ရင်ထဲကသောကတွေ ငြိမ်းချမ်းပြီလား။ ရင်ထဲမှာ သောကတွေကင်းပြီလားလို့မေးလာကြရင်ဖြင့်။ ကျုပ် ပထမပိုင်းကတည်းက ပြောပြခဲ့တယ်လေ။
"အောင်မြင်မှုက သက်သက်၊ အေးချမ်းမှုက သက်သက်" ဆိုတာ။
ပြီးတော့ ကျုပ်ကို အဲဒီမေးခွန်းမေးလာရင်
မနက်ဖြန်ဆိုတာ ရှိသေးလားလို့ ပြန်မေးပါရစေ။
မနက်ဖြန်ဆိုတာ ရှိသေးရင် ကျုပ်ရင်ထဲက သောက၊ ခင်ဗျားတို့ရင်ထဲက သောကတွေလည်း ရှင်သန်ထမြောက်လာကြဦးမှာပါပဲ။ မနက်ဖြန်ကို တမ်းတခြင်းသည်။ ဘ၀ကိုတမ်းတခြင်းမဟုတ်လား။ ဘ၀ကိုတမ်းကခြင်းသည်။ သောကကို ရင်ဝယ်၌သားငယ်ပမားထိန်းသိမ်းထားခြင်းဖြစ်သည်လို့ နားလည်ထားတယ်။
ဒါကြောင့် ကျုပ်လည်း သောကထုတ်ကို ပခုံးထမ်း ပြီးခရီးဆက်ရပြန်ပါတယ်။ ဒါတောင်လျှော့ချသင့်သလောက် လောကအနေအားဖြင့်တော့ လျှော့ချခဲ့ပြီးပြီ။ ဓမ္မအနေအားဖြင့်တော့ အစိမ်းသက်သက်ရယ်ပေါ့။ ဒါပေမယ့် ကျုပ် သောကငြိမ်းကြောင်းလမ်းကြောင်းဆီသို့ ကျုပ်ဦးတည်ထားတယ်။ ဒါကြောင့် ကျွဲကူးရေပါသဘောမျိုးဖြစ်အောင် စာလည်းသင် သောကတွေလည်းလျော့နိုင်သမျှလျော့အောင် လျှော့ချတဲ့အနေနဲ့ သောကငြိမ်းကြောင်းနည်းလမ်းကောင်းတွေကို Ph.D ကျမ်းပြုတဲ့အခါရေးသားမှာဖြစ်ပါတယ်။ လေ့လာမှာဖြစ်ပါတယ်။ မြန်မာပြည်မှာထင်ရှားတဲ့ ဆရာတော်ဘုရားတို့ရဲ့ တရားအားထုတ်နည်းကို Ph.D ကျမ်းပြုရင်း သောကငြိမ်းကြောင်းနည်းလမ်းကောင်းတွေကိုလေ့လာတင်ပြဘို့ စိတ်ကူးထားတယ်။ဒီ Ph.D ဆိုတဲ့ တောင်ကြီးက ကျုပ်ဘ၀မှာ အမြင်းဆုံးတောင် အရောက်ချင်ဆုံးတောင်၊
ကျုပ်မက်ခဲ့တဲ့ အိပ်မက်၊ ကျုပ် ရောက်ချင်တဲ့ မနက်ဖြန်ပဲ။
ဒီအတွက် ကျုပ် အချိန်တွေ ငွေတွေ ရင်းနှီးမြုပ်နှံမှုတွေ အများကြီးနဲ့ချီတက်ရမှာ။ ဆွေပစ် မျိုးပစ်ဆိုတာ ဒါမျိုးပေါ့။ မြန်မာပြည်က အဖွားအိုနဲ့ ဆရာအိုကို ကျုပ်အသေအချာ မပြုစုနိုင်သေးဘူး။ ကျုပ်ကလည်း ချစ်သော ကျုပ်ကိုလည်း ချစ်သော အဖေ အမေ မိဘဆရာသမား စတဲ့ အေးချမ်းတဲ့ အရိပ်တွေ အပြည့်အ၀ရ အပြည့်အ၀ပေးနေတဲ့ မွေးမြေရပ် မြန်မာနိုင်ငံကို ကျုပ်ပြန်မလာနိုင်သေးဘူး။ တစ်ခါတစ်လေ အမေကို လွမ်းလို့ငိုရတာ ခနခန၊ မနေနိုင်တဲ့ အခါ ကျုပ် အမေ့ဆီ ဖုန်းဆက်လိုက်တယ်။ အမေက ဟယ်လိုလို့ လုပ်တဲ့ အခါ "ဘာမှမဟုတ်ဘူး အမေ၊ အမေ့ကို လွမ်းလို့"လို့ ပြောပြီး ဖုန်းချပစ်လိုက်တယ်။ ဆက်ပြောရင် ကျုပ်ငိုတာ အမေသိမှာလေ။ ပျော်ရာမှာ မနေ တော်ရာမှာနေရ ဆိုတာ ဒါမျိုးနေမှာပေါ့။ ဒါကြောင့် ကျုပ်ရင်ထဲက အလွမ်းတွေကို တိတ်တိတ်လေး သိမ်းထားပြီး အနာဂတ်အတွက် ကြိမ်းဝါးလိုက်တယ် "နေနှင့်ဦးပေါ့ မနက်ဖြန်ရယ်"လို့..